HMOOB COJ NEEG NCIG TEBCHAWS

Nkawm roob Kab Puam (roob mis ntxhais quam ntuj)

Lub roob mis nyob ntawm txoj kev 4C hauv lub moos Kab Puam (Quản Bạ) nyob quas lub xeev Huj Yaj (Hà Giang) li 40km lawm yav qaum teb, nyob ze ze ciam teb Suav thiab Nyablaj. Roob mis nws muaj ob lub roob nyob ua ib ke zoo ib yam li tus poj niam ob lub mis. Tebchaws no ib txhia hu ua "ROOB NKAWM" los yog "ROOB MIS NKAUJ QAUM NTUJ". Ob lub roob no yog ib qho chaw uas cov neeg ncig tebchaws nyiam mus ncig saib nws qhov kev zoo nkauj uas xav tsis thoob li thiab neeg mus dhau mas lawv nyiam nres ntsia thiab thaij duab qhov kev zoo nkauj no.

Nkawm roob thaij deb (niam nkauj ntsuab ob lub mis)

Luag piav dab neeg hais tias; "thaum ub muaj ib tus tub hluas Hmoob nws zoo nraug heev thiab txawj txawj ntshuab ncas heev. Nws lub suab ncas nrov tau kho siab zim li tej me kab me noog quaj, tej thaum nrov tau tu siab tshaj plaws. tej thaum nrov ib yam tug dej tom kwj ha ntws, tej thaum li cua ntsuab hmo ntuj, tej thaum rov nta yees mus thoob txhua qhov thiab rov tau mus deb, deb zuj zus mus li. Nyob saum qaum ntuj muaj ib tus ntxhais qaum ntuj hu ua Paj Txiv Duaj nws zoo nkauj tshaj plaws li, nws lub cev ntag ntsug dawb mos yam li daus te dawb, nws daim di ncauj zoo tam li paj txiv duaj tawg thaum caij ntuj tshiab ntsw qab ntxiag, nws ob lub ncov plu dawb mos ntshiv ntshav ib yam li lub me paj ntshua nplaim tawg tshiab thiab nws lub ces yiag txias li mos sias ntsej muag nyias ntsais npaum nplooj qeeb.

Lub nrooog Kab Puam

Muaj ib hnub tus ntxhais qaum ntuj thiaj hnov tus nraug Hmoob lub suab ncas ces nws thiaj nyiag ya nrog huab nrog cua los rau hauv ntiajteb thiab los nrhiav tus nraug Hmoob. Thaum nws los nrhiav tau nkawd cia li sib nyiam thiab sib hlub ces nws tsis rov mus saum ntuj lawm. Nkawd sib yuav thiab nkawd yug tau ib tus me tub ntxim hlub heev. Muaj ib hnub yawm saub thiab paub hais tias tus ntxhais no tau nyiag kev khiav los hauv ntiajteb lawm, yawm saub thiaj tso tub txib los ntes tub ntxhais rov mus saum ntuj, tus ntxhais ncaim tsis tau nws cov txiv tub nws quav thov kom cia nws nrog nws cov txiv tub nyob tiamsis tsis muaj twg quav ntsej txog nws tej lus thov li, txog thaum kawg nws txhawj tsam leej txiv tu tsis tau tus me nyuam loj nws thiaj tseg nws ob lub mis cia rau tus menyuam tau noj kom nws loj hlob tiav txiv. Tom qab no tus menyuam noj loj hlob tiav txiv thiab ib ntev mus ces cia li ciaj ua ob lub roob li tam sim no. Ib txhia tseem tias twb yog li es niaj hnub no nyob rau ntawm lub tebchaws kab puam no huab cua laj ntxiag zoo heev, tej tub tej ntxhais tebchaws no los zoo nkauj zoo nraug thiab tej txiv hmab txiv ntoo, txiv duaj txiv khawb los txi ncw thiab qab zib dua li lwm qhov chaw. Hais tias leej niam lub kuas muag dhau mus ua tus tej dej ntws laj siab zim los yug tej qoob loo thiab nroj tsuag xyoob ntoo zoo mog nyuj nyoos ntsuab xwb xiab. Leej twg mus dhau no los xav tsis thoob li.

Hmoob tej pob kws

Lub moos Dong Van (Tooj Peeb)

Nyob rau lub tebchaws Ha Giang (Huj Yaj) yog ib lub xeev nyob rau Vietnam qaum teb. Lub tebchaws no yog ib lub tebhcaws toj siab kawg li. Thaum uas peb Hmoob khiav Suav teb los txog no ces sawvdaws cia li nyob ib ncig saum tej nqaj roob no los khwv noj khwv haus rau roob teb no nyob los txog niaj hnub nim no lawm. Tebchaws no thaum ub Hmoob kuj vam meej thiab kuj muaj ib tus Vajntxwv Hmoob uas hu Vaj Zoov Looj nyob rau lub xeev no lawm yav qaum teb thiab. Lub xeev no kuj dav, yav qaum teb yog Hmoob kav. Lub xeev no yog ib lub ntawm 3 lub xeev uas muaj Hmoob coob tshaj nyob Nyablaj teb.

Tej teb roob zeb

Peb cov Hmoob nyob tebchaws no nyob coob heev, tiamsis tu siab uas peb cov Hmoob nyob tebchaws no feem coob txom nyem heev vim tsis muaj liaj teb ua no. Lawv ua teb rau puag pem toj roob siab thiab pob zeb li pob zeb xwb. Tebchaws no ib txhia tseem yuav ev av mus rau saum tej qhov zeb es cog tsob pob kws rau. Tebchaws no tsis muaj dej haus li. Txoj nyem dej haus heev. Tseem hwv mus muab Ximaas luam ib cov pas rau ces thaum nag los hlob dej los puv cov pas no ces cov pej xeem ib ncig tuaj nqa mus haus xwb. Luag tseem hais tias cov nyob deb ces tuaj nqa mus haus hos cov nyob ze ib txhia tseem mus da. Cov laus nyob tebchaws no hais tias "peb muaj dej haus ces yog nplua nuj lawm".

Hmoob tab tom ua teb

Mus txog tebchaws no saib mas kuj pab tus siab kawg li saib peb tsoom Hmoob lub neej. Tsis muaj dej haus, tsis muaj liaj teb ua. Lawv mus ntaus zog lawm puag tom suav, tau nyiaj Suav los ces ib lim tiam mus tom khw mam mus pauv nyiaj tom khw xwb. Koj mus tom khw koj yuav pom muaj ib co neeg pauv nyiaj tom khw xwb.

Coj me nyuam npua mus muag

Dhau li ntawd tebchaws no kev khwv nyiaj ces yog xaws me ntsis khaub ncaws los yog yug tsiaj txhu thiab qoob loos coj mus muag xwb. Ib lim tiam no qhib khw ces mam coj qaib coj npua nrog rau twm thiab nyuj nees tuaj muag tom khw xwb, yog tsis li ntawd ces lawv tsis pom qab yuav mus nrhiav nyiaj los siv. Ib txhia ces thawm niaj thawm xyoo noj mov kuam xwb (mov pob kws). Ib txhia txiv neej lawv tseem tuaj ntxiv khau ntxiv khaub ncaws toj khw kom tau me ntsis nyiaj mus pab lub cuab lub yig. Muaj saib mas pab tu siab rau peb Hmoob kawg li. Yog leej twg tuaj ncig txog tebchaws Vietnam txhob Hnov qab mus saib peb cov Hmoob tebchaws no os mog.