HMOOB COJ NEEG NCIG TEBCHAWS

Ncig Ua Si Rau Meo Vac, Ha Giang

Lub nroog Meo Vac saib saum siab tuaj

Nyob rau lub tebchaws hu uas Meo Vac nyob rau qaum teb ntawm tebchaws Vietnam thiab npuab rau ciam teb Suav thiab Nyablaj nrug deb ntawm Hanoi mus 500km. Ntiav tsheb yuav tau mus ib hnub ib tav su thiaj txog. Yuav mus ncig kom txhua tej no yuav tau mus li 5-10 hnub thiaj xyuas tas tejchaw no. Nyob thaj tsam no feem coob yog peb cov Hmoob nyob xwb. Hmoob nyob coob heev. Lub tebchaws no peb Hmoob ib txwm khiav tom Suav los txog thaj chaw no ces sawv daws cia li nyob rau ntawm no.

Peb Hmoob ua lub neej nrog ej teb qhov zeb xwb

Rooj teb no mas toj roob zeb li toj roob zeb xwb. Nyob rooj teb khwv noj khwv haus yog cog pob kws rau saum tej teb qhov zeb xwb. Tebchaws no hais txog kev khwv qoob khw loo noj tsis yog yam yooj yim kiag li. Ncig mus txog rooj teb no zoo nkauj tau kho siab kawg li. Ntxim nuam yaj kawg li yog rau ib tus neeg dua kev. Tiamsis rau ib tus pej xeem nyob tebchaws no mas nyob tau tu siab thiab kho siab kawg li rau qhov nyob txom nyem heev. Kev khwv noj los nyuaj, dej haus los tsis muaj es nyob tiam dhau tiam thiab xwb.

Ob sab ntug kev cov tsev no feem coob yog Hmoob

Ib ncig yog roob pob zeb pob tsuas ces muaj kiag ib lub zeeg tiaj nyob hauv hav thiav lub nroog Meo Vac nyob kiag rau hauv. Hauv no kuj muaj Hotel zoo kawg thiab, tiamsis tsis muaj ntau. Muaj qee lub xwb, dhau li ntawd ces muaj Guest Hous. Yog lub caij uas muaj neeg coob mas twb nrhiav tsis tau chaw pw. Hauv lub nroog no lawm yav pem taw roob muaj peb cov Hmoob nyob coob kawg li thiab. Nyob kiag hauv nroog no. Thaum ub Dr. Yang Dao kuj nyob lub tebchaws no mus. Nce lawm pem ntav toj muaj ib lub chaw xyuam yaj ntsia tuaj hauv nroog zoo nkauj kawg li.

Tuaj saum chaw nuam yaj thaij duab mus rau hauv nroog

Cov Hmoob uas nyob ib hauv nroog no

Hauv Meo Vac muaj khw, muaj chaw noj mov zoo kawg li thiab. Yuav tawm hauv lub nroog Meo Vac no mas yuav tau hla roob xwb. Txawm koj yuav nce mus los yog koj yuav nqis los rau chaw nqis rau qhov nws ua ib lub zeeg tiaj thiab hauv ib lub vuam hav. Yog muaj hmoo txog rau nyablaj teb mas yuav tau mus saib tej no thiaj tsim nyog. Yog yuav mus saib peb Hmoob lub neej mas yuav tau mus rau rooj teb no thiab yog ib qhoiv chaw ua tsim nyog mus.

Saum roob xyuam yaj saib mus rau Hmoob tej teb thiab txoj kev mus rau lub khw kev hlub Khau Vai uas ib xyoos muaj ib zaug uas ib txwm nrov nrov.

Peb Hmong Tours muaj coj neeg mus rau tebchaws no txhua txhua hli. Leej twg xav mus ncig tebchaws no ces hu los yog contract rau peb ntawm HmongTours.Net.

NKAWM ROOB MIS NYOB QUAN BA, HA GIANG

Nkawm roob Kab Puam (roob mis ntxhais quam ntuj)

Lub roob mis nyob ntawm txoj kev 4C hauv lub moos Kab Puam (Quản Bạ) nyob quas lub xeev Huj Yaj (Hà Giang) li 40km lawm yav qaum teb, nyob ze ze ciam teb Suav thiab Nyablaj. Roob mis nws muaj ob lub roob nyob ua ib ke zoo ib yam li tus poj niam ob lub mis. Tebchaws no ib txhia hu ua "ROOB NKAWM" los yog "ROOB MIS NKAUJ QAUM NTUJ". Ob lub roob no yog ib qho chaw uas cov neeg ncig tebchaws nyiam mus ncig saib nws qhov kev zoo nkauj uas xav tsis thoob li thiab neeg mus dhau mas lawv nyiam nres ntsia thiab thaij duab qhov kev zoo nkauj no.

Nkawm roob thaij deb (niam nkauj ntsuab ob lub mis)

Luag piav dab neeg hais tias; "thaum ub muaj ib tus tub hluas Hmoob nws zoo nraug heev thiab txawj txawj ntshuab ncas heev. Nws lub suab ncas nrov tau kho siab zim li tej me kab me noog quaj, tej thaum nrov tau tu siab tshaj plaws. tej thaum nrov ib yam tug dej tom kwj ha ntws, tej thaum li cua ntsuab hmo ntuj, tej thaum rov nta yees mus thoob txhua qhov thiab rov tau mus deb, deb zuj zus mus li. Nyob saum qaum ntuj muaj ib tus ntxhais qaum ntuj hu ua Paj Txiv Duaj nws zoo nkauj tshaj plaws li, nws lub cev ntag ntsug dawb mos yam li daus te dawb, nws daim di ncauj zoo tam li paj txiv duaj tawg thaum caij ntuj tshiab ntsw qab ntxiag, nws ob lub ncov plu dawb mos ntshiv ntshav ib yam li lub me paj ntshua nplaim tawg tshiab thiab nws lub ces yiag txias li mos sias ntsej muag nyias ntsais npaum nplooj qeeb.

Lub nrooog Kab Puam

Muaj ib hnub tus ntxhais qaum ntuj thiaj hnov tus nraug Hmoob lub suab ncas ces nws thiaj nyiag ya nrog huab nrog cua los rau hauv ntiajteb thiab los nrhiav tus nraug Hmoob. Thaum nws los nrhiav tau nkawd cia li sib nyiam thiab sib hlub ces nws tsis rov mus saum ntuj lawm. Nkawd sib yuav thiab nkawd yug tau ib tus me tub ntxim hlub heev. Muaj ib hnub yawm saub thiab paub hais tias tus ntxhais no tau nyiag kev khiav los hauv ntiajteb lawm, yawm saub thiaj tso tub txib los ntes tub ntxhais rov mus saum ntuj, tus ntxhais ncaim tsis tau nws cov txiv tub nws quav thov kom cia nws nrog nws cov txiv tub nyob tiamsis tsis muaj twg quav ntsej txog nws tej lus thov li, txog thaum kawg nws txhawj tsam leej txiv tu tsis tau tus me nyuam loj nws thiaj tseg nws ob lub mis cia rau tus menyuam tau noj kom nws loj hlob tiav txiv. Tom qab no tus menyuam noj loj hlob tiav txiv thiab ib ntev mus ces cia li ciaj ua ob lub roob li tam sim no. Ib txhia tseem tias twb yog li es niaj hnub no nyob rau ntawm lub tebchaws kab puam no huab cua laj ntxiag zoo heev, tej tub tej ntxhais tebchaws no los zoo nkauj zoo nraug thiab tej txiv hmab txiv ntoo, txiv duaj txiv khawb los txi ncw thiab qab zib dua li lwm qhov chaw. Hais tias leej niam lub kuas muag dhau mus ua tus tej dej ntws laj siab zim los yug tej qoob loo thiab nroj tsuag xyoob ntoo zoo mog nyuj nyoos ntsuab xwb xiab. Leej twg mus dhau no los xav tsis thoob li.

Hmoob tej pob kws

KHW HMOOB TOOJ PEEB, HA GIANG

Ntawm ncauj ke

Lub khw Tooj Peeb (lus nyab laj hu Đồng Văn) nyob rau lub xeev Huj Yaj (Hà Giang) npuab nkaus rau ciam teb Suav. Tebchaws no peb cov Hmoob nyob coob heev. Muab hais ib tsoom neeg nyob ib ncig tej no ces yog Hmoob li Hmoob xwb, muaj ib txhia Suav xwb. Thaum ub Hmoob khiav Suav teb los ces los txog tej no lawv los nyob npuab tus ciam teb no xwb.

Chaw muag nyuam npua

Nyias coj nyias li menyuam npua tuaj muag tom khw

Cab nyuj tuaj muag tom khw

Lub khw no ib lim tiam no muaj ib zaug thiab lawv qhib rau hnub Sunday (vas thiv). Lub khw no muaj peb Hmoob kuj muag ntau yam khoom xws li; khaub ncaws, paj ntaub, npua, nyuj, nees, nqaij npuas, me nyuam aub, noog, qaib, ncuav pob kws, ncuav nplej thiab hlau txuas tej tseem muaj ntxiv khau thiab khaub ncaws tej tib sib thiab.

Txiv neej Hmoob ntxiv Khaub Ncaws tom khw

Tshwj xeeb tshaj plaws feem coob yog Hmoob xwb. Lwm hais neeg tsuag tuaj muag khoom xwb. Mus ncig lub khw no thiaj pom thiab Hmoob tiag tiag thiab Hmoob lub neej thaum ub tiag tiag. Lom zem tshaj plaws yog lawv muag cawv thiab lawv tuaj haus cawv, tsis hais poj niam los txiv neej lawv tuaj haus cawv xauv npo xwb. Cov cawv yog Hmoob cub thiab yog Hmoob coj tuaj muag, lawv siv ntim los haus thiab haus cawv qhuav xwb. Haus cawv yog tus txiv qaug cawv pw tom kev lawm los tus niam yuav tau tos tus txiv xeev cawv ces mam mus thiab txawm yog tus niam qaug los tus txiv kuj yuav zaum tos ib yam thiab.

Muag kawm

Laab fawm

Khaub Ncaws

Yog peb ib tsoom Hmoob thoob ntuj leej twg tuaj txog tebchaws Vietnam nej yuav tau nrhiav kev mus saib lub khw Hmoob no nawb. Nyob ze ciam teb Suav heev. Hauv lub moos no muaj Hotel thiab kuj yog ib lub chaw rau cov neeg mus travel thiab. Mus tebchaws no saib tej liaj tej teb thiab toj roob zeb mus sawv lawm saum roob saib rau hauv moos mas zoo nkauj tau kho siab zim xwb.