Hmoob lub hauv toj
Peb Hmoob ib tiam dhau ib tiam
los lub tsiab 30 yeej tseem ceeb heev rau peb haiv Hmoob. Lub tsiab 30 yog ib
lub sijhawm uas peb khwv khwv ib xyoos puag ncig es peb tseg tau ib lub caij
los so, los sib ncig. Lub tsiab 30 tsis hais cov laus los yog cov hluas yeej npaj
siab tos rawv lub paj tsiab 30 yuav npaj ves khaub ncaws tshiab mus nrog luag
nqaum paj nqaum nruas, mus nrhiav khub rau yus, mus ntsib tej qub phoojywg.
Hmoob lub hauv toj
Dhau los ntau tiam los txog tiam
nim ho muab saib tsis tseem ceeb luaj twg lawm thiab. Txawm li ntawd los peb
tseem muaj lub tsiab 30 rau ib tsoom Hmoob tuaj mus nqaum paj nqaum nruas rau
thaum noj 30. Sawvdaws yeej tos ntsoov txog peb lub 30 uas noj sib pub haus sib
ce.
Nim no peb cov Hmoob khiav mus
thoob qab ntuj ib cov nyob lawm ib sab ntuj nyias noj nyias lub tsiab 30 raws
li nyias qhov lawm. Vim dabtsi ua rau peb Hmoob zoo li no lawm? Yog xav paub
txog qhov no peb yuav tsum rov mus saib me ntsis keeb kwm ntawm peb Hmoob lub
tsiab 30.
Hmoob lub hauv toj
Raws li cov laus hais keeb kwm tseg
ces thaum peb nyob rau Suav teb peb Hmoob poob teb poob chaw ces peb Hmoob
thiaj khiav tawg los mus rau dej liab los taug tus dej liab los los thiaj los
ntsib tus dej ntsuab los sib tshuam ua ke. Thaum li no thiaj muab xav tias yog
taug tus dej ntsuab rov qab ces yuav rov lawm peb Suav, yuav rov mus ntsib Suav
cov uas twb muab peb caum tua, yog li no thiaj txiav txim siab tias cia hla
lauj no es thiaj hla ntawm dej liab dej ntsuab sib tshuam no los rau sab
Nyablaj teb uas nim no yog nyob kiag ntawm lub nroog Lao Cai uas yog Nyablaj
qaum teb thiab lub nroog Huj Khawv uas yog Suav lub nroog qab teb ntawd.
Thaum uas peb Hmoob los mus dhau
ntawd ces cov laus ib txhia thiaj tuag tas rau tus dej no. Thaum no nyias thiaj
mus nyias ces ib txhia thiaj mus rau sab Nyablaj teb ces nyob txog niaj hnub ni
no hos ib txhia thiaj hla toj tuag tshaib dawm tuag no mus rau Moos Theeb ,
Moos Laim thiaj hla mus rau sab Laos.
Cov uas khiav mus rau Moos Theeb, Moos Laim ces yog khiav mus rau Puab Yib teb
no ces Puab Yib lub tsiab 30 tsis thooj li peb Hmoob lub lawm. Thaum muab los
sib tham ces thiaj hais tias aub yog l ices sau qoob tag los ces muaj lub tsiab
30 noj es dhau thiaj zoo mus ua qoob thiaj tsis tab kaum sijhawm thiaj li caum
cuag luag. Txij ntawd ces peb cov Hmoob uas khiav dhau sab ntawd thiab mus noj
tsiab 30 dua ib lub caij lawm. Los txog niaj hnub nim no los peb cov Hmoob uas
khiav ib txhij ntawd mus es mus nyob Moos Theeb , Moos Laim, Yen Bai thiab Son
La tseem noj tsiab 30 nrog rau peb cov Hmoob nyob Laos ib lub caij tsuag cov
mus tshiab tom qab no thiaj txawv xwb. Peb cov Hmoob uas khiav mus rau Thaib
mus rau Mekas thiab Fab Kis los yog lwm lub tebchaws ces ib txhia nyias mus noj
nyias sib txawv tag lawm. Txawm li ntawd los peb Hmoob tseem nco ntsoov txog
peb lub Paj Tsiab 30.
Hmoob lub hauv toj
Tshuav cov Hmoob uas tseem nyob
rau sab uas tsis tau khiav mus dhau toj tuag tshaib dawm tuag no tseem noj lub
tsiab 30 ib yam li peb Hmoob cov laus ib txwm noj uas yog noj tom qab 2 lub
hlis. Raws li cov laus hais tseg mas peb Hmoob ib txwm nyob Suav teb los ces
peb noj tsiab 30 raws li cov Hmoob uas tsam no tseem nyob sab Nyablaj qaum teb.
